मुंबई, २९ जुलै : महाराष्ट्र अन्न व औषध प्रशासन (FDA) ने राज्यभर सुरू असलेल्या विशेष अन्नसुरक्षा मोहिमेत मुंबईतील काही प्रतिष्ठित क्लब्स आणि ऐतिहासिक खाद्यसंस्थांवर मोठी कारवाई केली आहे. मुंबईतील सहा दशकांहून अधिक इतिहास असलेल्या फोर्ट येथील प्रसिद्ध ‘पूर्णिमा रेस्टॉरंट’चा FSSAI परवाना निलंबित करण्यात आला आहे. याचबरोबर Cricket Club of India (CCI), RK Juhu Gymkhana, The Aparna Juhu Gymkhana, MIG Cricket Club आणि The Willingdon Sports Club या पाच नामांकित क्लब्सचेही FSSAI परवाने तत्काळ निलंबित करण्यात आले आहेत. ही कारवाई २४ ते २७ जुलै दरम्यान झालेल्या विशेष तपासणी मोहिमेनंतर करण्यात आली.
पूर्णिमा रेस्टॉरंटमध्ये गंभीर अन्नसुरक्षा त्रुटी
फोर्टमधील प्रसिद्ध पूर्णिमा रेस्टॉरंटच्या तपासणीत अन्नसुरक्षा आणि स्वच्छतेच्या नियमांचे गंभीर उल्लंघन आढळल्याचे FDA ने म्हटले आहे. तपासणीदरम्यान झुरळांचा प्रादुर्भाव, अस्वच्छ स्वयंपाकघर, बुरशी लागलेल्या भाज्या, अन्न साठवणुकीतील त्रुटी आणि इतर स्वच्छतेच्या गंभीर समस्या निदर्शनास आल्याने रेस्टॉरंटचा अन्न व्यवसाय परवाना निलंबित करण्यात आला.
५ प्रतिष्ठित क्लब्सवर एकाचवेळी कारवाई
FDA च्या विशेष मोहिमेत खालील क्लब्सचे FSSAI परवाने निलंबित करण्यात आले आहेत:
- Cricket Club of India (CCI)
- RK Juhu Gymkhana
- The Aparna Juhu Gymkhana
- MIG Cricket Club (वांद्रे पूर्व)
- The Willingdon Sports Club
तपासणीत या आस्थापनांमध्ये झुरळे व माश्यांचा प्रादुर्भाव, बुरशी लागलेल्या भाज्या, मुदतबाह्य अन्नपदार्थ, अस्वच्छ स्वयंपाकगृहे, शाकाहारी व मांसाहारी अन्नाची एकत्र साठवणूक, तापमान नियंत्रणातील त्रुटी आणि अन्न हाताळताना स्वच्छतेच्या नियमांचे उल्लंघन आढळल्याचे अधिकाऱ्यांनी नमूद केले.
गोरेगाव स्पोर्ट्स क्लबला व्यवसाय बंद करण्याचे आदेश
FDA च्या तपासणीत गोरेगाव स्पोर्ट्स क्लब (मालाड पश्चिम) येथे आवश्यक अन्न व्यवसाय परवान्याशिवाय खाद्यसेवा सुरू असल्याचे आढळले. त्यामुळे संबंधित आस्थापनाला ‘Stop Business Notice’ बजावत अन्न व्यवसाय तात्काळ बंद करण्याचे आदेश देण्यात आले आहेत. तसेच आणखी एका आस्थापनाला सुधारणा नोटीस देण्यात आली असून, त्रुटी दूर करण्याच्या सूचना देण्यात आल्या आहेत.
तुकाराम मुंढे यांच्या नेतृत्वाखाली राज्यव्यापी मोहीम
अन्न व औषध प्रशासन आयुक्त तुकाराम मुंढे यांच्या नेतृत्वाखाली राज्यभर अन्नसुरक्षा नियमांची कठोर अंमलबजावणी सुरू आहे. गेल्या काही दिवसांत अनेक रेस्टॉरंट्स, कॅन्टीन, क्लब्स आणि खाद्य आस्थापनांवर कारवाई करण्यात आली असून, अन्नसुरक्षेबाबत कोणतीही तडजोड केली जाणार नसल्याचा स्पष्ट संदेश प्रशासनाने दिला आहे.
वारसा जपत आधुनिक अन्नसुरक्षेची गरज
पूर्णिमा रेस्टॉरंटसारख्या अनेक दशकांचा वारसा लाभलेल्या खाद्यसंस्थांवर झालेल्या कारवाईमुळे एक महत्त्वाचा प्रश्न पुढे आला आहे. शहराच्या खाद्यसंस्कृतीचा वारसा जपत आधुनिक अन्नसुरक्षा, स्वच्छता आणि FSSAI मानकांचे काटेकोर पालन करणे तितकेच आवश्यक असल्याचे या कारवाईतून स्पष्ट झाले आहे. FDA ने सर्व खाद्य व्यावसायिकांना नियमांचे पालन करण्याचे आवाहन केले असून, त्रुटी दूर केल्यानंतरच परवाने पुन्हा बहाल करण्याबाबत विचार केला जाणार आहे.