ठाणे, २३ एप्रिल — ठाणे, भिवंडी, कल्याण आणि उल्हासनगर परिसरातील नागरिकांसाठी मोठा दिलासा देणारी बातमी समोर आली आहे. मुख्यमंत्री देवेंद्र फडणवीस यांनी मुंबई मेट्रो मार्गिका-5A (Metro 5A) प्रकल्पाला मंजुरी दिली असून, कापूरबावडी ते दुर्गाडी दरम्यानच्या या महत्त्वाच्या मेट्रो मार्गाला ‘ग्रीन सिग्नल’ मिळाला आहे.
या प्रकल्पासाठी एकूण ₹१८,१३० कोटींची गुंतवणूक करण्यात येणार असून, हा प्रकल्प दोन टप्प्यांत राबवण्यात येणार आहे. या मेट्रो मार्गाची एकूण लांबी ३४.२१ किमी असून, त्यामध्ये १९ स्थानकांचा समावेश आहे.
टप्पा 1 अंतर्गत कापूरबावडी ते धामणकर नाका, तर टप्पा 2 मध्ये धामणकर नाका ते दुर्गाडी असा मार्ग प्रस्तावित आहे. या मार्गिकेचा विस्तार पुढे कल्याण ते उल्हासनगरपर्यंत करण्यात येणार असून, यामुळे सुमारे ६९ लाख नागरिकांना थेट फायदा होणार आहे.
या प्रकल्पामुळे ठाणे-कल्याण दरम्यानचा प्रवास वेळ ४० ते ५० टक्क्यांनी कमी होण्याची शक्यता असून, दैनंदिन प्रवाशांना मोठा दिलासा मिळणार आहे. तसेच, वाहतूक कोंडी कमी होऊन परिसरातील कनेक्टिव्हिटी सुधारण्यास मदत होणार आहे.
दरम्यान, हा प्रकल्प गेल्या काही वर्षांपासून रखडलेला होता. पंतप्रधान नरेंद्र मोदी यांनी २०१८ मध्ये या मेट्रो प्रकल्पाचे भूमिपूजन केले होते. मात्र, भिवंडी परिसरात मार्ग उड्डाणपूलावरून की भूमिगत घ्यायचा, या तांत्रिक वादामुळे प्रकल्प पुढे सरकू शकला नाही.
कल्याण शहरात मेट्रोचा मार्ग कसा असणार याबाबतही अद्याप काही प्रमाणात संभ्रम आहे. सुरुवातीला दुर्गाडी ते बाजार समिती असा मार्ग प्रस्तावित होता, मात्र नागरिकांच्या मागणीनंतर हा मार्ग बदलून बिर्ला कॉलेजमार्गे कल्याण रेल्वे स्थानकापर्यंत नेण्याचा प्रस्ताव पुढे आला आहे. तरीही, प्रत्यक्ष काम सुरू न झाल्याने या बदलांची अंमलबजावणी कधी होणार, याकडे सर्वांचे लक्ष लागले आहे.
एकूणच, मेट्रो 5A प्रकल्पाला मिळालेली मंजुरी ही ठाणे-कल्याण परिसराच्या दृष्टीने महत्त्वाची पायरी मानली जात असून, प्रत्यक्ष कामाला गती मिळणे आणि प्रकल्प वेळेत पूर्ण होणे हेच आता नागरिकांसाठी सर्वात मोठे आव्हान ठरणार आहे.